حجــــرة في يــــدي

حجرة في يدي

السلام عليكم ورحمة الله تعالى وبركاته
كلماته اعجبتني وزركشة معانيه جعلتني افكر في ان انشره....الدنيا تعلم حتي الحجر ينطق؟؟

هبطــــــــــت نقعد على شــط البحر ***حكمتلي يا نـــــــاس نقعـد شـويا وحـدي
انحي على خاطري مع راسي نقسر*** هكدا نقعد بعيد وين واحــد ما يجي عندي
نشوف فمواج لبحر ونرمي فلحجر*** وكل حجرة تردنــي قريــب عــام للماضي
نرمي حجرة بحجرة ما جبتـش خبر*** لحقت لواحد الحجرة شد يتها مليح فيدي
فكرتني في يــوم من يامــات الصغر*** كـــنت صغير صغير واش فوتت يــا وعدي
تفكرت بلــي لازم نبكــي كــي نتفكر*** ديك لمعيـــشة لمرة تسيـــل الدمعة فخدي
ليــــالي لعــذاب او أيــــام الــــــفقر ***نشفا كنت مريض والمشكل ماشي مرضـي
المشكــل امي الـي كـــــــانت تسهر*** وانا نقــــــــوللها امـــــي روحـــي ترقدي
وابي الي كـــــان يدبـــر ويحبــر ***ويقــول نحمل كلشي على جـــــال ولاادي
كـــان دايق المر هكـــذاك او يصبـر ***مــايبغيش يبين ويقـــول للدمعة بعـــدي
وامي تــــانيت قـاسما معاه الضـر*** تقولـــــــو من عنـــــدك وشويـــا من عندي
نربو ولدنــا و غـدوة رايح يكـــبر*** يفرج عليـــــــــنا ويخلف ليــــــام هاذي
كنت كل ما نسمع امـي هكــذا تهــدر ***نحس كلي امانة حطتــــها فــــــي يـــدي
نقـــول لازم نكبر ولازم عليــا نقدر*** ندير واش مــــا دار ابي ولا جــــــــــــدي
وهوما يقولولي ولــدنا غير اصبر*** غدوة رايح تكبر وتديـــر هــادي وهــادي
وانــــا لاتــــي نحســــب غير فلعمر*** ونفـرح غــير نهـــار يلحــق عيـد ميلادي
نجي نطفي الشمعة والشمعة باغيا تهدر*** حــابة تقــولي حــاجة وهي بنـارها تقدي
حابة تقولي....... ماكش جايب خبر*** راني نبكـي عليـك شــــوف الدمعة فخدي
وانا جبت خبر.. المـــــهم اني نكبر ***درت لـحسـاب زوج مرات في يـــــــــدي
لقيت عشرين سنة وعـالم وحدوخر*** ماشـي كي لحســـاب الي درتو فالماضي
حسبت راني ماشي لقيت روحي موخر*** مــــافهمتش زهر هكذا زهــري وسعدي
ولا حقي انا راه عند وحــــــــدوخر*** ولا نتي يا الدنيا عدتـــي تنحــــي وتمدي
الناس تتقــاسم وانــا قــاعد اللـــخر*** نستنى ولا ....حيـــــاة لمـــــن تنـــــــادي
القلـــب تعمــــــر رحــت زعما نهدر*** مع ناس تقول نتاعهم هــاد الدنيا هادي
ناس مــا يحبــــوش الي جـايب خبر*** يحبو كيما يقولو تقـــول رانـــي راضي
تلعبـــــها تعـــــرف يحفـــــرولك قبر*** تولي حــــي او ميت غـــير جاي وغادي
كلمـــا تحوس تهــدر غير تزيد تعمر*** راسك بلهمـــــوم تولــي ماشـــي عادي
لتما دمعت عيني وبد يــــــت نتفكـر ***بويــــا .امــــا .الي مد يتلهم وعــــــدي
كيفـاش راح نديـر شكـون عليا يدبر*** واش نــردلهـــم واش نخـــــلي لــــولادي
خـــــايف يموتـــــو والــــد يا وتطفر*** لتما يا سمـــا ارعدي و يا الشمس بعدي
بعد يني يا الدمـعة .بعـدني يا الزهر*** خلوني غير وحدي نبكـــي على سعدي
على شــــط البحر ونـــرمي فلحجر*** وحجرة منهــــــم شــــايدها في يـــــــدي
حجرة عزيــــزة ما لازمـــش تتبحر*** تمتل بالنســـبة لي ذ كـــريات الماضي
دروك وعلاش رانـــي قاعد نهدر*** والهدرة فالحق مـــــا تجيب مــــــــا تدي
علاش ماشي خير نسمــي ونستغفر*** والي كتبــــو ربي بيـــه رانـــي راضــــي
نحطها في جيبــي ولو حـتى نخسـر*** ماني رايـــح نخســر غير الد نيــا هـــادي
والشـــدة فالله هو مفتـــاح الصــــبر*** نشـــــد غـــير فيه وغـــــير ليـــه انـــادي
سبحـــــــانو وحدو هو الـــي قـــادر ***فـــــي رمشــــت عيـــن يرد كلشـي عـادي
والـــي ظلمنــــي و دار فيــا الشر*** يعـــــيى يتهرب فـــــــالد نيـا هــــــــــاذي
ياك نتلاقاو في عـــــــالم وحدا خر*** و كيـــما عذ بنـــــي راح نعذبــــو بيــــدي
امــــا والديا نكـــــافيـــــهم بــــالبر*** والخـــــارج مـالد نيا واش رايـــــــح يـدي
الا فعــــــــــل الخيـــر ويقــــول نكبر*** ذرية صــالحة تدعيـلــــي مـن بعــــــــدي
وبالــنسبة لـــولادي راه كــــل شبـر*** قـــال ربي سبحانو راهـــم في حفضــي
مـــا من دابـــــة في الارض والـبحر ***الا وقـــــــــــال راه رزقــــــــها عـــــــندي
ربي سبحــــانو يحب الـــــــي يصبر*** ومـــــا يكلفك يــــــا نفس الا مـــــــا تقدي
عندو كل شـي مقضـــي ومقدر*** وقـــــــــــال انا لست ظلاّم لعبـــــــــــــادي
فوق هاذ الكلمة مــــــانزيد سطـــر ***الا و نخـــــــــــتم وبـــــــــاسمي نمضـــي

بارك الله فيكي على النقل الرائع

بارك الله فيكي اختي المهاجرة والله اتحفتينا بردودك
تقبلي مروري

دموع الاطلال