الغلاء

الزوجة :
يا الغايب في الحقول **** واين البطاطة والفول
واين الكسبر والكروية ****واين القتة تاع السنرية
واين الكيلو تاع الثوم **** وواين الجيقو تاع اللحوم
وواينهي القضية تاع البيت ****من سمن وزبدة وبدون الزيت
واينهي شهرية هذا اليوم **** وكيف نرقدوا ويجينا النوم
واش الي جبتيلي في القفة **** شكارة حليب وخبز يا حفة
*******
الزوج :
ويا مرتي العزيزة **** واش جابنا للتنكريزة
اصبري عليا شويا **** حتى نريح رجليا
ونحكيلك الحكاية *****من اللول للنهاية
**********

الزوجة :
راني نسمع لكلامك الغريب **** والخير الي جبتلي من خبز وحليب
******

الزوج :
السوق معمر *** بالغاشي مقنطر
يتضاربوا بالدبزة *** باش يلحقوا على الخبزة
وانا في وسطهم محير **** واش نشري وواش نخير
الغلى والكوى **** كي الماكلة كي الدواء
دخلت للسوق **** بالغلى محروق
الغاشي يتقاتل **** على الخضرة والفلافل
دخلت للجزار **** لقيته شاعل نار
المرقاز الرخيس **** غالي تيفيس
والا البقري ****اسكتي ولا تهضري
والا الدجاج **** ما يديهش المحتاج
والغاشي يتضارب ****واحد جاي والاخر هارب
خرجت رحت للخضار ****نثم بعد احكمني الدمار
اللي حكيتي عليهم ****مانجيبهم ما نشريهم
عندك البصل والثوم ****ترد العبد دايخ ومغموم
ريحتها تدير الدمار **** كيفها كيف ريحة الخيار
والا هذاك الفول ****يخلي العبد يمشي مهبول
لاهو خضر لاهو فصاص ***من القلقة وليت كي الباص
جات عيني عالسنرية ****من الرعشة تكسروا سنية
قلت كان تبقى غير هي **** نصوم عليها كي الملوخية
أنا كرهت ومليت ****من هذا القضية تاع البيت
الشهرية ما تكفي عيلة ****سبع مية قالولك قليلة
*******
كاداتك الماكلة المسكينة ****جاي العيد ويعرينا
يلزم تكسيهم في تزينة ****من لمين لياسمينة
******
اتزوجنا وابتلينا ****جاييا ربي غير هنينا

س -ب